Trinchado as trooskos

Jeanne Calitz:stillewe:trinchado
V
an my hoop op ’n rustiger week het daar toe net mooi dadels gekom. Administrasie net waar ek kyk en pligte wat ek gemeen het afgehandel is, wat terugkom om my te treiter. Ag wat, party weke loop so. Volgende week is ek wel deeglik op verlof en dan is daar tyd vir rus.

Intussen deel ek graag die resep vir trinchado waarmee ek hierdie week geëksperimenteer het, in reaksie op die koel herfsweer. Ek het dit reeds Woensdag gemaak, en was net-net klaar toe die krag hier in Woodstock uitskop. Regtig, die gereg het ’n wonderbaarlike skans gevorm teen die tierende wind en die donker wat so vinnig en swaar uitgesak het. Hy’t net die regte raps hitte om die koue te verdryf. Dis die soort gereg wat nog beter smaak die volgende dag, wanneer die verskeidenheid geure tyd gehad het om behoorlik te meng en ontwikkel.

Let wel, hierdie is nié ’n subtiele gereg nie – die paprika en die rissie maak beide stem dik, om nie te praat van die knoffel nie. Maar dis ’n heerlik geurige affêre wat die gemoedere sal lig (rissies laat jou brein endorfiene afskei!) en die maag sal behaag.

Trinchado
Genoeg vir 4
Bestanddele:

600 g bees- of varkfillet, in dik repies gesny
2 E Worcestershire-sous
sagte botter
2 uie, halveer en in ringe gesny
6 knoffelhuisies, fyngekap
2 klein gedroogde brandrissies, fyngekap (gebruik jou oordeel hier, rissies se branderigheid wissel van soort tot soort)
½ k rooiwyn
2 k beesekstrak
1.5 E meel
sout en peper na smaak
1 E suiker
5 ml paprika
2 loerierblare (bay leaves)

1. Drup die Worcestershire-sous oor die vleis en laat eenkant staan en marineer vir minstens 20 minute.
2. Plaas so 7.5 ml botter in ’n pan en verhit oor medium tot hoë hitte. Verbruin nou die helfte van die vleis hierin, skep uit en hou eenkant.
3. Herhaal die proses met die res van die vleis – nog ’n hoë eetlepel botter in die pan, verbruin en skep uit.
4. Braai nou die uie en knoffel in dieselfde pan in 1 E botter.
5. Voeg die rissie, wyn en ekstrak by en laat opkook sodat die alkohol kan wegkook.
6. Roer nou die loerierblare by, gevolg deur die paprika, suiker, en sout en peper na smaak.
7. Voeg die meel by en roer deur sodat die mengsel effens verdik.
8. Proe die sous: as dit nie genoeg skop het nie, voeg nog rissies by. As dit (weens die rooiwyn) te suur is na jou smaak, voeg klein bietjies gelyke hoeveelhede suiker en sout by om die suurheid te neutraliseer. Ek weet daar is dié wat hou van die soetsuur-smaak wat die wyn aan die storie gee, maar ek verkies dit sout en hitsig.
9. Voeg nou die vleis in die pan en laat kook tot deurgaar, maar nie taai nie.
10. Jy kan dit voorsit saam met kapokaartappels, of aartappelskyfies en broodrolletjies om in die sous te doop. In my geval het ’n vriendin by ons gekuier vir ete, so ek het die gereg so bietjie opgetert deur dit op te dien saam met geroosterde baba-aartappels, asook ’n bykos van geroosterde wortels en witwortels (parsnips), gegeur met komyn en peper.*

(*Laasgenoemde het héérlik uitgekom, ek is beslis oorgehaal wat betref die wondere van die witwortel, en sien uit om verder met dié seisoenale groente te eksperimenteer …)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s