Nog tamaties – nou vir ’n driftige teriyaki

Jeanne Calitz stillewe teriyakeEk was nooit regtig ’n kerrie-mens nie, tot ek in 2013 vir ’n paar weke saam met my man Sri Lanka toe is. Daar eet jy kerrie, of jy eet nie. Want kerrie en rys is Sri Lanka se nasionale gereg – kerrie vir ontbyt, kerrie vir middagete, kerrie saans. Dit klink dalk of ek kla: dis glad nie die geval nie. Die besoek was ’n openbaring. Ons het soos konings gesmul aan die oneindige variasies van kerrie en rys wat aan ons voorgesit is, en mettertyd raak die palet al hoe meer gewoond aan die branderigheid van die kos. (Plus, jy sluk dit af met die heerlikste vars, versoete lemmetjiesap om die brand te blus, of regte gemmerbier om die maag te bedaar.) Waarlik, die plek se kos het só ’n diep indruk gemaak dat ons vir ’n kort kookkursus gegaan het by ’n skaam maar baie vriendelike tannie, bloot bekend as Mama, en haar behulpsame dogters in die suidelike dorpie van Galle.

Van die sowat tien resepte wat hulle daardie dag met ons deurgedraf het, was my gunsteling en die een wat ons die gereeldste maak, ’n resep vir garnaal-teriyaki. Nou ja, Suid-Afrika is nie so ryk aan garnale soos Sri Lanka nie, en boonop is dit op die oranjelys, sover ek weet. So ek maak hierdie teriyaki met ontbeende hoenderdye, of kasjoeneute vir ’n vegetariese alternatief. Die lekker ding van dié resep is dat dit in die somer grootliks staatmaak op seisoenale groente soos soetrissies, brandrissies en tamaties.

Ek gaan eerlik wees, dit vat nogals ’n rukkie se sny en kap voordat jy kan begin kook. Maar as daardie gedeelte eers klaar is, dan gaan dit sommer vinnig – die hele gaarmaaktyd behoort nie langer as 15 minute te neem nie. Onthou dus om die rys op te sit voor jy begin met die wok, anders gaan jy droëbek moet sit en wag. Hoe dit ookal sy, hierdie gereg maak die wag die moeite werd.

Hitsige teriyaki met soetrissies en tamaties
Lewer 4-5 porsies, afhangende van hoe groot die soetrissies is.

Jeanne Calitz stillewe teriyake2

Bestanddele:
Handig van die resep is dat dit soortvan ’n tema het: jy het vier nodig van elk van die belangrikste bestanddele:

4 soetrissies, in duimgrootte stukkies gesny
4 knoffelhuisies, fyngekap
4 stingels preie (leeks), behoorlik afgespoel en in 1 cm-dik ringe gesny (kyk mooi, daar kruip altyd bietjies grond onder die buitenste blare weg)
4 T groente-olie
4 T sojasous
4 medium tamaties (ryp maar steeds ferm)
2 rooi of bruin uie, in agstes gesny
1 t sout
½ t growwe peper
1 t borrie
1 suurlemoenstingel, in 4 dele in die lengte gesny
4 T tamatiesous
½ t rissievlokkies, of gekapte vars brandrissie na smaak (dis veronderstel om ’n branderige affêre te wees, toets maar self)
350 g ontbeende hoenderdye, in repies gesny (of kasjoeneute)
Basmatirys, om voor te sit

Metode:
1. Geur die hoender (as jy dit gebruik) met sout en peper, en verbruin vlugtig in ’n pan.
2. Verhit intussen die olie in ’n wok. Voeg nou al die bestanddele by behalwe die sojasous, tamaties en tamatiesous, en braai vlugtig.
3. Wanneer die geure lekker uit die wok begin opslaan, kan jy die sojasous byvoeg, gevolg so ’n paar minute later deur die hoender. Roer alles goed deur en laat prut todat die soetrissies begin versag.
4. Voeg die tamatiesous by die mengsel en roer goed deur. Laat vir so 2 minute prut en proe die sous: as dit te tamatie-rig proe kan jy nog so 1 T sojasous bygooi.
5. Sny die tamaties in agstes en voeg by die mengsel so 2 minute voordat jy wil opskep. Roer goed deur – die idee is dat die tamaties net lekker warm word, nie dat dit uitmekaar kook nie.
6. Sit voor met basmatirys. (En dalk ’n lekker glas chenin blanc …)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s