In seisoen: Geelperskes

perskes voor

Daar is min dinge wat sê hoogsomer soos ‘n ryp geelperske. Ek sal nie my neus optrek vir ‘n nektarien nie, maar vir die geelperske voel ek heelwat meer. Die fluweelagtige skil, sy sagte oranje kleur, die soet reuk wat om die vrug hang soos ‘n belofte … “Kom ‘n bietjie nader,” fluister die geelperske. Graag, dankie.

Die vrug bring vir my talle gelukkige herinneringe terug. Van Desember-vakansies, oppad seetoe saam met die familie, en eers stop by die padstal buite Robertson vir klomp vrugte, insluitend minstens een boks druiwe en nog een vol geelperskes. Groot en vet en rond was hulle, en suikersoet. En ek dink terug aan een naweek toe my ouma van Stellenbosch af deurgekom het Paarl toe vir die om perskes in te lê. Bokse en bokse perskes het ons daardie dag geskil en in water laat lê todat dit hul beurt was om ingekook te word in die potte vol suikerwater op die stoof. Die hele huis het na vrugte en suiker geruik en ons kinders het waarskynlik een perske geëet vir elke drie wat ons  in die pot gegooi het … Ons het JARE later nog aan daardie perskes gesmul, elke nou en dan op ‘n Sondag een van die glasflesse afgehaal wat soos helder soldaatjies bo-op die kombuiskaste uitgestal was. Heerlik.

Vandag nog is daar min dinge lekkerder as om ‘n ryp perske of drie in die oond te bak saam met vanielje en suiker, en voor te sit met ‘n skep roomys. Hierdie somer het wil ek egter eksperimenteer met ‘n roomys van geelperskes, en later die week mik-mik ek na ‘n persketert-konkoksie. Sal sien hoe dit uitwerk. Maar eers, ‘n slaai! Ek besef almal deel nie my opwinding oor slaaie nie maar hierdie een is a) nogals interessant en b) het heelwat om die lyf. Boonop is dit ‘n lekker manier om oorskiet geroosterde hoender op te gebruik.

Die basis is heel eenvoudig, maar dis die slaaisous wat hom bietjie byt gee …

Slaai met geroosterde hoender en geelsperskes
Genoeg vir 2

perskes klaar

Bestanddele
1 – 2 ryp geelperskes
oorskiet geroosterde hoender, sowat twee boudjies en dye elk
halwe Mediterreense komkommer, in repe geskil of skywe gesny
250 g kersietamaties, gehalveer
bronkors (watercress)
handvol vars basilie- en mentblare*

1. Skil die perskes af en sny in wiggies of blokkies na smaak.
2. Skeur die hoender in happie-grootte repies.
3. Rangskik al die bestanddele na wense op ‘n opskepbord.

Slaaisous:
(Alle eer aan die grote Nigel Slater vir hierdie mengsel, ek was skepties oor die vissous maar regtig waar, dis heerlik – die sous maak die slaai, en die rissie gee ‘n bietjie byt aan die perske, wat op sy eie ‘n raps eendimensioeneel sou kon wees.)

Meng 3 T vars lemmetjiesap met 3 T vissous, 2 t strooisuiker en 1-2** klein brandrissies, fyngekap. Voeg so 2 T gekapte sprietuie by, roer deur en laat staan vir so paar minute eenkant sodat die geure lekker kan meng.
Drup mildelik oor die slaai.

* Om eerlik te wees het die basilie se droplekker-geur vir my hier en daar te sterk deurgekom. Mens sou dit met groot sukses met koljander kon vervang, vermoed ek. En terwyl ons praat van plaasvervangings – die geelperske sou jy ook met vrymoedigheid kon vervang met nektariens. O, en om nie van mango te praat nie!

** Nigel se resep vra vir 2 brandrissies met pitte, maar dit maak van die slaai nogals ‘n hitstige affêre. Ek sou voorstel 2 rissies, ontpit, en dan fyngekap.

One thought on “In seisoen: Geelperskes

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s